Бишкектин четинде курулуп жаткан 51 миң орундуу жаңы стадионго “Азаттык Арена”, ал эми президенттик резиденциянын жанындагы жаңы конгресс-холлго “Ырыс Ордо” деген ат ыйгарылды.
Бул тууралуу ШКУ саммитине жана Дүйнөлүк көчмөндөр оюндарына даярдык боюнча уюштуруучулук комитеттин жыйынында анын төрагасы Каныбек Туманбаев билдирди.
“Биз объекттердин аталыштарын президент менен кеңешүүдөн кийин талкуулап, бекиттик. Бул — өлкө үчүн тарыхый чечим, анткени мындай ири долбоорлор Кыргызстанда биринчи жолу ишке ашууда”, — деди Туманбаев.
“Азаттык Арена” стадиону 51 миң орундуу болуп курулуп жатат (башында 45 миң орун деп пландалган). Ал жерде Дүйнөлүк көчмөндөр оюндарынын ачылыш жана жабылыш салтанаттары өтөт.
Ал эми “Ырыс Ордо” конгресс-холлу президенттик администрациянын («Ынтымак Ордо») жанында жайгашып, 2026-жылдагы ШКУ саммитинин негизги аянтчасы болот.