Президент Садыр Жапаров Ысык-Көлдө «Улан» балдар борборун ачуу аземинде Мамлекеттик ипотекалык компания (МИК) үйлөрдү жарандарга жылдык 8% үстөк менен жана баштапкы төлөмсүз бериле турганы каралып жатканын билдирди.
Анын айтымында, көп балалуу үй-бүлөлөргө, мүмкүнчүлүгү чектелген жарандарга, жаш адистерге жана мамлекеттик кызматкерлерге социалдык ипотека 4% менен да сунушталат.
Быйыл 10 жылдыгын белгилеп жаткан МИКтин капиталы 10 млн сомдон 87,5 млрд сомго чейин өстү. Учурда компания аркылуу 13 миң 850 үй-бүлө турак жайлуу болду, дагы 40 миң 411 жаран кезекте турат.