«Евровидение-2026» сынагына Израиль катышса, анда Испания өлкөсү катышуудан баш тартат. Мындай маалыматты Испаниянын мамлекеттик телерадиокорпорациясы RTVE таркатты.
RTVEнин директорлор кеңеши президент Хосе Пабло Лопестин демилгесин карап чыгып, 15 мүчөнүн 10у колдоп берди.
Лопес буга чейин EBUга кайрылып, Испаниядагы жарандык коомдун Газа секторундагы кырдаалга байланыштуу тынчсызданууларын жана Израилдин катышуусун кайра кароону сунуштаган.
EBU болсо буга чейин «Евровидениени саясий жактан нейтралдуу конкурс» деп атап, Израилди чыгаруу пландары жок экенин билдирген.
Испания ушундай чечим кабыл алган бешинчи өлкө болуп калды. Мунун алдында Нидерландия, Словения, Исландия жана Ирландия Израил катышса, конкурс өткөрүүгө бойкот жарыяларын билдиришкен.