Бишкек шаарында таштандыларды кайра иштетүүчү завод 28-декабрда ачылат. Бул тууралуу мэр Айбек Жунушалиев Биринчи радиого билдирди.
Заводдун долбооруна ылайык, суткасына кеминде 800 тонна таштандылар кайра иштетилет, потенциалы 1500 тоннага чейин жеткирилет. Ошондой эле станция болжол менен 460 мегаватт электр энергиясын өндүрүп, жаңы инфраструктура жана электр линияларын камтыйт.
Азыркы учурда заводдун аймагында административдик имарат курулуп, кире бериш жолдор төшөлүп, саркынды сууларды тазалоочу жана өндүрүштүк жайларды монтаждоо иштери жүрүүдө.
Мэрдин айтымында, негизги максат — таштандыларды жөн эле өрттөп жиберүү эмес, экологиялык жактан коопсуз кайра иштетүү.
«Бизде аягында бир грамм да зыяндуу заттар болбошу керек», — деди Айбек Жунушалиев.
Ал ошондой эле Бишкекте азыр таштандыларды бөлүп чыгаруу маданияты жок экенин белгилеп, шаар тургундарын сорттоого үйрөтүү жана келечекте экологиялык жоопкерчиликти өнүктүрүү зарыл экенин кошумчалады.