Кытай тараптагы Эверест тоосунда болгон катуу кар бороонунун айынан 900гө жакын турист, гид жана башка кызматкерлер дем алыш күндөрү кыйын кырдаалга туш болгон.
Кытайдын мамлекеттик маалымат каражаттарынын маалыматына ылайык, алардын баары коопсуз жерге чыгарылды. Жалпысынан 580 турист жана 300дөн ашык гид, як баккан пастухтар жана кызматкерлер куткарылган.
Алардын ичинен 350 адам дүйшөмбү күнү түшкө чейин, калган бөлүгү болсо шейшембиде коопсуз аймакка жетишкен.
«Синьхуа» агенттигинин билдирүүсүндө, айрым туристтер суук тийип, тоңуп калышкан. Жаракат алгандарга куткаруучулар тамак-аш, дары-дармек, жылыткыч жана кычкылтек жеткирип беришкен.
Операциянын жүрүшүндө куткаруучулардын ыкчам иш-аракеттеринин аркасында олуттуу жоготуулар катталган эмес.