Нобель комитети аны “акыр заман коркунучу шартында искусствонун күчүн ырастаган ынанымдуу жана көсөм чыгармачылыгы үчүн” сыйлаганын билдирди.
Ласло Краснахоркаи — венгриялык заманбап классиканын көрүнүктүү өкүлдөрүнүн бири. Анын белгилүү чыгармаларына “Каршылык меланхолиясы” (1989), “Согуш жана согуш” (1999), жана “Си-ван-му биздин арабызда” аттуу романдары кирет. Жазуучунун алгачкы китеби 1977-жылы жарык көргөн. Ал 2017-жылдан тарта Нобель сыйлыгына талапкерлердин катарында аталган.
Краснахоркаи белгилүү режиссер Бела Таррдын бир катар фильмдеринин сценаристи катары да таанымал. Азыркы тапта ал Италиянын Триесте шаарында жашайт. Жазуучу өзүн Венгриянын премьери Виктор Орбандын саясатына каршы чыккандыктан ыктыярдуу бозгунда жүрөм деп эсептейт.
Өткөн жылы бул сыйлык түштүк-кореялык жазуучу Хан Ганга ыйгарылган. 1901-жылдан бери Нобелдин адабият сыйлыгын жалпы 121 адам алган.
Быйыл медицина, физика жана химия боюнча сыйлыктардын лауреаттары буга чейин белгилүү болгон. Ал эми тынчтык сыйлыгы жума күнү Ослодо жарыяланат. Экономика боюнча Нобел сыйлыгынын ээси 13-октябрда аныкталмакчы.
Сыйлыктарды тапшыруу аземи салт боюнча 10-декабрда — Нобел сыйлыгынын негиздөөчүсү, филантроп Алфред Нобелдин көз жумган күнүндө өтөт. Лауреаттарга диплом, алтын медаль жана 11 миллион швед кронасы (болжол менен 1,1 миллион доллар) өлчөмүндөгү акчалай сыйлык берилет.