Бүгүн, 29-октябрда, Түркия Республикасы түзүлгөнүнө 102 жыл толду. Бул күн түрк элинин тарыхындагы жаңы доордун башаты болуп, мамлекеттүүлүктүн негизги урааны — «Эгемендүүлүк толугу менен элге таандык» — мамлекеттик башкаруунун өзөгүнө айланган.
1923-жылдын 29-октябрында Мустафа Кемаль Ататүрктүн жетекчилиги менен Түркия расмий түрдө республика деп жарыяланган. Ошондон тартып бул күн түрк элинин эң башкы улуттук майрамы — Республика күнү катары белгиленип келет.
Түркиянын республикалык түзүлүшүнө алып келген жол 1920-жылдын 23-апрелинде, улуттук-боштондук күрөш маалында Улуттук жыйындын (ВНСТ) ачылышы менен башталган. Бирок өлкөнүн эгемендүүлүгү эл аралык деңгээлде 1923-жылдын 24-июлунда Лозанна келишими аркылуу гана таанылган.
Анкара 1923-жылдын 13-октябрында расмий түрдө Түркиянын борбору болуп жарыяланган. Ошол учурда өлкөнү Улуттук жыйындын төрагасы Мустафа Кемаль Ататүрк жетектеп турган.
25-октябрда өкмөт отставкага кеткенден кийин саясий кризис жаралып, Ататүрк бул кырдаалды мамлекеттин жаңы башаты — республика жарыялоо үчүн мүмкүнчүлүк катары пайдаланган.
1923-жылдын 28-октябрына караган түнү Ататүрк жана Исмет Иноню 1921-жылкы Конституцияга өзгөртүүлөрдү киргизүү боюнча мыйзам долбоорун даярдашкан. Кийинки күнү — 29-октябрда, Түркия расмий түрдө республика деп жарыяланган, ал эми Ататүрк өлкөнүн алгачкы президенти болуп шайланган.
Бүгүн Түркия боюнча миллиондогон адамдар бул тарыхый күндү салтанаттуу иш-чаралар, параддар жана концерттер менен белгилеп, Ататүрктүн мурасына болгон урматын билдиришүүдө.