Кыргыз Республикасынын Президенти Садыр Жапаров бүгүн, 5-ноябрда, АКШ президенти Дональд Трамптын чакыруусу менен Америка Кошмо Штаттарына иш сапары менен барды.
Мамлекет башчысынын учагы “Эндрюс” авиациялык базасына конуп, аны АКШнын мамлекеттик катчысынын Түштүк жана Борбордук Азия иштери боюнча жардамчысы Пол Капур жана башка расмий өкүлдөр тосуп алышты. Сапарды урматтоо иретинде килем төшөлүп, ардактуу кароол ротасы тизилди жана жоокерлер эки өлкөнүн тууларын кармап турушту.
Садыр Жапаров сапардын алкагында «С5+1» форматындагы мамлекет башчыларынын саммитине катышат. Иш-чара платформа түзүлгөнүнө 10 жыл толгонуна карата өтүп, Борбор Азия өлкөлөрү менен АКШнын өнөктөштүгүн кеңейтүү жана актуалдуу регионалдык маселелерди талкуулоого багытталган.
Ошондой эле Кыргыз Республикасынын Президенти Садыр Жапаров менен АКШ Президенти Дональд Трамптын эки тараптуу жолугушуусу да пландалган.