Кыргыз Республикасынын Министрлер Кабинети энергетикалык натыйжалуулукту жогорулатуу жана электр энергиясын сарамжалдуу пайдалануу боюнча жаңы чараларды кабыл алды.
Чечимге ылайык, административдик мамлекеттик мекемелерде ички жана тышкы жарыктандыруу менен электр приборлорун колдонуу саат 18:00дөн 06:00гө чейин чектелет.
Өкмөттүн маалыматына караганда, бул чаралар стратегиялык объектилерге, ошондой эле түнү-күнү иштеген коопсуздук, саламаттык сактоо жана социалдык мекемелерге тиешелүү болбойт.
Энергетика министрлигинин эсептөөсү боюнча, жаңы режимди киргизүү ай сайын 40 миллион киловатт-саат электр энергиясын үнөмдөөгө мүмкүндүк берет.
Белгиленгендей, быйыл өлкөдө электр керектөө 1 миллиард киловатт-саатка көбөйгөн. Бул өсүш жаңы ишканалардын, билим берүү жана социалдык мекемелердин ачылышына, ошондой эле турак жай курулушунун кеңейишине байланыштуу.
Учурда Токтогул суу сактагычындагы суунун көлөмү былтыркыдан 2 миллиард кубометрге аз, ошондуктан өкмөт суу жана энергия ресурстарын сарамжалдуу пайдалануу зарылдыгын баса белгилөөдө.
Министрлер Кабинетинин негизги максаты – Токтогул суу сактагычындагы сууну туура пайдалануу жана энергетикалык системанын туруктуу иштешин камсыздоо.