Филиппиндин президенти Фердинанд Маркос-младший өлкөдө өзгөчө абал режимин жарыялады. Бул чечим өкмөттүн каржылык жардамды ыкчам бөлүштүрүүсүнө жана азык-түлүккө баанын көтөрүлүшүнө жол бербөөгө шарт түзөт.
Өлкөдө «Калмаэги» тайфунун кесепеттерин жоюу иштери уланууда. Расмий маалыматтарга ылайык, 140 адам каза болуп, ондогон адамдар дайынсыз жоголгон. Жалпысынан 2 миллионго жакын жаран жабыркаган, алардын ичинен 560 миңден ашууну үйлөрүн таштап чыгууга мажбур болгон.
Табигый кырсыктан Себу провинциясындагы Талисай шаарында ондогон үйлөр кыйрап, инфраструктура олуттуу жабыр тартты. Ошондой эле, Агусан-дель-Сур провинциясында филиппин аба күчтөрүнө таандык тик учак кулап, анын айынан алты аскер каза болду.