Япониянын премьер-министри Такаити Санаэ Тайванда мүмкүн болгон өзгөчө кырдаал тууралуу айткандан кийин Токио менен Пекиндин ортосундагы чыңалуу күчөй бериши күтүлүүдө. Кытай Япониянын өкмөт башчысын бул сөздөрүнөн баш тартууга чакырууда.
Такаитинин билдирүүсүнөн кийин эки өлкө ортосундагы мамиле олуттуу начарлады. Январда өтмөкчү болгон Япония–Кытай–Түштүк Корея үч тараптуу саммитинин өтүшү да күмөндүү болуп калды. Пекин «азыркы шарттар жол бeрбей турганын» билдирген.
Чыр уланып жаткан маалда Такаити шейшемби күнү АКШ президенти Дональд Трамп менен телефон аркылуу сүйлөштү. Трамп АКШ–Кытай мамилелериндеги акыркы жагдайлар тууралуу, анын ичинде дүйшөмбү күнү Кытай лидери Си Цзиньпин менен өткөн телеконференция жөнүндө маалымат берди.
Кийинчерээк Такаити Япония менен АКШ эл аралык кырдаалдын фонунда тыгыз кызматташууну улантаарын баса белгиледи. Токио өкмөтү бул сүйлөшүүлөрдү маанилүү деп баалап, алар япон-америкалык альянстын бекемдигин тастыктаганын билдирди.
Ошол эле учурда Япониянын тышкы иштер министринин орун басары Фунакоси Такэхиро Кытайдын Япониядагы элчиси У Цзянхао менен жолугушту. Жолугушууда Фунакоси өкмөт шейшемби күнкү министрлер кабинетинин жыйынында «өлкөнүн жашоосуна коркунуч жаратуучу кырдаал» боюнча салттуу позициясын толук сактоо чечимин кабыл алганын түшүндүргөнү айтылды.
Япония Кытай менен ар түрдүү деңгээлде диалогду улантууга ниеттенүүдө. Бирок эки тарап үчүн тең ылайыктуу чечим табуу оңой болбой турганы белгиленүүдө.