Сириянын түндүгүндөгү Алеппо шаарында өкмөттүк күчтөр менен күрт куралдуу түзүмдөрүнүн ортосунда кагылышуулар кайрадан тутанды. Салгылашуулар экинчи күн катары менен уланып, артиллерия колдонулууда.
Жергиликтүү булактардын маалыматына ылайык, кагылышуулардын алгачкы күнүндө кеминде алты адам каза тапкан. Reuters агенттиги түн салыштырмалуу тынч өткөнүн, бирок 7-январда атышуулар кайра күчөгөнүн билдирди.
Алеппонун саламаттык сактоо башкармалыгы дагы төрт адамдын набыт болуп, 18 киши жаракат алганын маалымдады.
Сириялык күрттөр жарандык согуш маалында өлкөнүн түндүк-чыгышында жана Алепподо автономдуу аймактарды түзүшкөн. Алардын куралдуу түзүмдөрү — Сирия демократиялык күчтөрү — Дамасктагы жаңы бийлик менен түзүлгөн макулдашууга ылайык, 2025-жылдын аягына чейин бирдиктүү сириялык армиянын курамына кошулушу керек эле. Бирок тараптар бул макулдашуунун ишке ашпай калышына бири-бирин айыптоодо.
Дамасктагы бийлик Алеппонун Шейх-Максуд жана Ашрафия райондорунда «мыйзамдуу аскердик буталарга» сокку урулуп жатканын билдирсе, күрт күчтөрү кагылышууларды өкмөт баштаганын айтууда.
Коопсуздук кырдаалынын курчушуна байланыштуу Алеппо аэропорту убактылуу жабылып, бир катар көчөлөр жана Түркияга кеткен жол тосулду. Бийлик жарандарды эвакуациялоо үчүн гуманитардык коридорлорду ачкан. Жарандык коргонуу кызматынын маалыматына ылайык, жаңжал болуп жаткан аймактардан болжол менен 10 миңдей адам чыгып кеткен.