АКШнын Улуттук контртеррордук борборунун директору Джо Кент кызматтан кетүү чечимин кабыл алды. Ал бул кадамын Иранга каршы мүмкүн болгон аскердик соккулардын негиздүүлүгүнө күмөн саноо менен түшүндүрдү.
Кенттин айтымында, ал “таза абийир менен согушту колдой албайт”. Анын бул чечими АКШ администрациясынын ичинде да Иранга карата күч колдонуу маселеси боюнча ар кандай пикирлер бар экенин көрсөтөт.
Ал 2025-жылдын июль айында кызматка дайындалып, Улуттук контртеррордук борборду жетектеп келген. Бул мекеме террордук коркунучтар тууралуу маалыматтарды чогултуу, талдоо жана федералдык кызматтардын ишин координациялоо менен алектенет.
Кенттин отставкасы Дональд Трамп администрациясындагы айрым өкүлдөрдүн да аскердик аракеттерге карата тынчсыздануусу күчөп жатканын айгинелейт.
Ошол эле учурда, АКШда соңку мезгилде ички коопсуздукка байланышкан кооптонуулар да күчөдү. Мисалы, Мичиган штатындагы Синагогада жана Вирджиниядагы университетте болгон кол салуулар коомчулуктун тынчсыздануусун жараткан.
Ал эми Дональд Трамп Кенттин чечимине сын айтып, Иранды олуттуу коркунуч катары баалап, анын администрациясында мындай позициядагы адамдарга орун жок экенин белгиледи.