Кыргызстандын Ички иштер министрлиги алдыдагы Орозо айт жана Нооруз майрамдарына байланыштуу күчөтүлгөн тартипте кызмат өтөөгө өткөнүн билдирди. Маалыматка ылайык, министрликте өткөн жыйында майрам күндөрүндөгү коопсуздук чаралары кеңири талкууланды.
Жалпы өлкө боюнча коомдук жайларда, мечиттердин айланасында жана майрамдык иш-чаралар өтчү аймактарда 12 миңден ашуун милиция кызматкери тартипти камсыздайт.
Ички иштер министри Улан Ниязбеков кырдаалды туруксуздаштыруу аракеттерине жол берилбей турганын белгиледи. Анын айтымында, жалган маалымат таратуу же чагымчылык аракеттер дароо токтотулуп, мыйзам чегинде катуу чаралар көрүлөт.
Белгилей кетсек, 20-мартта Орозо айт, ал эми 21-мартта Нооруз майрамы белгиленет.