Президент Садыр Жапаров «Салык эмес кирешелер кодексине өзгөртүү киргизүү жөнүндө» мыйзамга кол койду. Бул мыйзам Жогорку Кеңеш тарабынан 2026-жылдын 26-февралында кабыл алынган.
Президенттик администрациянын маалыматына ылайык, мыйзамдын максаты — жарандарга мамлекеттик кызматтар үчүн төлөмдөрдү жасоодо жеңил шарттарды түзүү.
Жаңы эрежелерге ылайык, мамлекеттик төлөмдөрдү эми банкоматтар, төлөм терминалдар, интернет-банкинг, мобилдик банк жана тиркемелер, электрондук капчыктар жана башка дистанциялык жолдор аркылуу жүргүзүүгө болот. Мындай чаралар жарандардын сотторго, мамлекеттик жана башка органдарга кайрылуу укугун эффективдүү пайдаланууга мүмкүндүк берет, ошондой эле банк аркылуу же накталай акча менен төлөө чектөөлөрүн жоёт.