Бразилиянын башкы прокурору мурдагы президент Жаир Болсонару 2022-жылдагы шайлоодо утулгандан кийин төңкөрүш жасоого аракет кылган деп айыптады. Бул тууралуу BBC жазды.
Жалпысынан 69 жаштагы Болсонару жана шериги делген 33 адам кылмыштуу топ түзүү жана өлкөдөгү демократиялык процесстерге таасир этүүгө аракет кылуу сыяктуу беш берене боюнча айыпталган.
Өлкөнүн башкы прокурору Пауло Гонет Бранко: «Айыптар демократиялык институттарга каршы уюштурулган жана ишке ашырылган кутумдун чоо-жайын чагылдырат» деди.
«Башка адамдар, анын ичинде жарандар жана аскер кызматкерлери менен бирге алар (топтун мүчөлөрү) макулдашылган түрдө 2022-жылдагы президенттик шайлоонун жыйынтыгын тастыктоого кийлигишүүгө аракет кылышкан», — деп айтылат прокуратуранын билдирүүсүндө.