26-майда Жогорку Кеңештин төрагасынын орун басары Нурланбек Азыгалиев Россия Федерациясынын федералдык жыйынын Мамлекеттик Думасынын депутаты, Кесиптик бирликтердин жалпы конфедерациясынын башкы катчысы Виктор Пинский менен жолугушту.
Маалыматка ылайык, жолугушууда эки өлкө ортосундагы саясий-экономикалык, маданий-гуманитардык алакалардын учурдагы абалы талкууланып, парламенттер аралык кызматташтыкты кеңейтүү тууралуу сөз болду.
Ошондой эле эмгек мигранттарынын маселеси көтөрүлдү: «Акыркы учурларда Россияда миграция чөйрөсүн тартипке салган бир топ мыйзамдар кабыл алынып жатат. Албетте кайсы гана өлкөдө болбосун тиешелүү талаптарды аткаруу маанилүү. Эмгек мигранттарынын арасында да мыйзамсыз жүргөндөрү жок эмес. Ошол эле учурда жумуш берүүчү тараптардан да кемчилик кеткен учурлар көп кездешип келет. Андыктан бул маселени кеңири талкуулап, биргелешип чечүүгө чакырам», — деди ал.
Мындан тышкары Азыгалиев эмгек мигранттарынан алынчу орус тил сынагын жана милдеттүү медициналык кароону Бишкектеги Борис Ельцин атындагы Кыргыз-Россия Славян университетинде өткөрүүнү сунуштады.
Өз кезегинде Виктор Пинский аталган сунушту колдой турганын айтып, ал боюнча атайын демилге көтөрүп чыгууну убадалады. Ошондой эле Кыргызстандын Эмгек, социалдык камсыздоо жана миграция министрлиги менен да мигранттардын маселесин кеңири талкуулаганын айтып, бардык суроо-талаптар жакшы жагына чечилерине үмүт артарын кошумчалады.