Кыргызстандын тышкы иштер министри Жээнбек Кулубаев Кувейттин Инвестициялык агенттигинин башкаруучу директору шейх Сауд Салим Абдулазиз Аль-Сабах менен жолукту.
Жолугушууда кувейттик тарапка Кыргызстандагы келечектүү секторлорго, анын ичинде “жашыл экономика”, гидроэнергетика, транспорт, туризм жана логистика тармактарындагы инфраструктуралык долбоорлорго инвестиция салуу мүмкүнчүлүктөрүн карап көрүү сунушталды.
Министр Жээнбек Кулубаев Кувейттин Инвестициялык агенттигинин башкаруучу директорун 2025-жылдын жайында Кыргызстанда өтө турган “Борбордук Азия жана Булуңдагы Араб мамлекеттеринин кызматташтык кеңеши” инвестициялык форумуна катышууга чакырды.
Кувейттин Инвестициялык агенттигинин башкаруучу директору чакыруу үчүн ыраазычылыгын билдирип, чет элдик инвестицияларды тартуу боюнча Кыргыз Республикасынын өкмөтүнүн аракеттерин жогору баалады. Ошондой эле сунушталган инвестициялык долбоорлорду изилдөөгө жана аларды ишке ашырууга активдүү катышууга кызыкдар экенин билдирди.
Жолугушуунун жыйынтыгында тараптар инвестиция, соода, логистика жана туризм тармагында эки өлкө ортосундагы кызматташууну өнүктүрүү боюнча ишти улантууну макулдашты.