Министрлер кабинетинин төрагасынын биринчи орун басары Данияр Амангелдиев 30-апрелде Ташкент шаарында өткөн Көз карандысыз мамлекеттер шериктештигинин Экономикалык кеңешинин жыйынына катышты.
Маалыматка ылайык, жыйын тажик тараптын төрагалыгы алдында тар жана кеңейтилген курамда өттү. Жыйындын алкагында «INNOPROM. Борбор Азия» эл аралык көргөзмөсү жана КМШ региондорунун биринчи форуму да өтүүдө.
Данияр Амангелдиев сөзүндө Кыргызстандын КМШ өлкөлөрү менен тышкы соодасынын оң динамикасын белгиледи. Ал 2020-2024-жылдар аралыгында Кыргыз Республикасы менен Шериктештик мамлекеттеринин ортосундагы өз ара сооданын көлөмү 2,1 эсеге, анын ичинде экспорт 2,4 эсеге, импорт дээрлик 2 эсеге өскөнүн айтты.
Мындан тышкары, ал КР министрлер кабинети тарабынан быйылкы жылы ишке киргизүү пландаштырылган 128 өнөр жай объектинин тизмеси түзүлгөнүн билдирди.
Жыйындын жүрүшүндө шериктештикке мүчө мамлекеттердин соода-экономикалык кызматташтыгын тереңдетүү боюнча мындан аркы чаралар ар тараптуу талкууланып, тиешелүү чечимдер кабыл алынганы айтылат.