Жакынкы Чыгыш өлкөлөрүнөн дагы 142 кыргызстандык жаран мекенине кайтарылды. Бул тууралуу Кыргыз Республикасынын Тышкы иштер министрлиги билдирди.
Маалыматка ылайык, бул иш-чара Садыр Жапаров тарабынан берилген тапшырманын алкагында уюштурулуп, жарандарды кайтаруунун кезектеги этабы ийгиликтүү аяктады.
2026-жылдын 15-мартында таңкы саат 06:30да Манас эл аралык аэропортуна Сауд Аравия Падышалыгынан 142 кыргызстандык жаранды алып келген атайын учак конду. Буга чейин биринчи этапта Кувейт, Бахрейн жана Катар мамлекеттеринде жүргөн жарандар автобустар аркылуу Эр-Рияд шаарына жеткирилген.
Министрлик кооптуу аймактардан жарандарды эвакуациялоо боюнча иштер улантыларын билдирип, кырдаал толук турукташканга чейин жарандарды аталган өлкөлөргө баруудан убактылуу карманууга чакырды.