Кыргызстанда эл аралык айтыш башталып, ага Кыргызстан, Казакстан, Өзбекстан, Каракалпакстан жана Кытай Эл Республикасынын Кызыл-Суу автономдук округунан төкмө акындар катышууда.
Айтыш – байыртан бери кыргыз элинин маданий мурасынын ажырагыс бөлүгү болуп келген улуу искусство. Акындар элдин ой-мүдөөсүн ыр менен жеткирип, сөз өнөрүнүн чеберчилигин көрсөтүшөт. Бул өнөр элдик руханий дөөлөттөрдүн бири катары ар дайым жогору бааланып келген.
Акыркы жылдары айтыш кыргыз менен казактын гана эмес, бүткүл түрк дүйнөсүнүн маданий мурасына айланып, 2015-жылы Кыргызстан жана Казакстандын атынан ЮНЕСКОнун материалдык эмес маданий мурастар тизмесине киргизилген.
Бул ирет айтышка коңшу мамлекеттерден акындардын келиши анын эл аралык деңгээлинин өсүп жатканын далилдеп турат. Иш-чаранын алкагында мыкты айтышчыларга сыйлыктар тапшырылып, жеңүүчүлөр “Алтын комуз” сыйлыгына татыктуу болот.