Президент Садыр Жапаровдун демилгеси менен Казакстан президенти Касым-Жомарт Токаевдин атасы Кемел Токаевдин ысымы Бишкектеги мектеп-гимназияга ыйгарылды. Бул тууралуу президенттин кеңешчиси Арслан Койчиев маалымдады.
Кемел Токаев 1923-жыл 2-октябрь Алматы облусунун Каратал районундагы туулган.
Казак жазуучусу, казак прозасындагы детектив жанрынын негиздөөчүсү.
Коллективдештирүү жылдарында жана ага удаа келген ачарчылык маалында Кемел Токаевдин үй-бүлөсү өз мекенин таштап, журт которууга аргасыз болгон; бир нече жыл Фрунзе шаарында жашаган. Бул жерде Кемел Токаев ата-энесинен, жакындарынан ажырады. Жетим балдар үйүндө тарбияланган.
Улуу Ата Мекендик согуш жылдарында тагдыр Кемел Токаевди экинчи жолу Кыргызстанга алып келди. Ал Фрунзе шаарындагы жөө аскерлер мектебинде (азыркы 33 — мектеп-гимназияда) билим алып, ушул жерден фронтко чакырылган.
Согуштагы эрдиги үчүн «Советтер Союзунун Баатыры» наамына көрсөтүлгөн. Бирок ал наам эмнегедир ыйгарылган эмес.
Жакында президент Касым-Жомарт Токаев 33 — мектеп-гимназияга автобус белек кылды. Автобус согуштун баатырларын эскерип, атасы окуган мектепке сый-урмат катары берилди. Ошондой эле мектептин мыкты бүтүрүүчүлөрү үчүн Алматыдагы Сатпаев университетинде акысыз окууга үч орун бериле турганы белгилүү болду.