Кытай ысырапкорчулукка каршы күрөшүү жана чыгымдарды азайтуу жөнүндө токтом чыгарды.
Бул токтомго ылайык, мамлекеттик жана партиялык кызматкерлер иш күндөрдөгү түштөнүүлөрдө кымбат тамактанып, тамеки тартып, ичкилик ичкенге болбойт. Ушул эле документтин 20-статьясы мамчиновниктерге кымбат баалуу белектерди алууга, кымбат эс алууларга, чет өлкөлөрдөгү азарттык оюндарга катышууга тыюу салат. «Чет өлкөлөргө чыкканда мамлекеттик каражаттар мамлекеттер аралык белектерди алмашууга, конокторду эс алдырууларга жумшалбашы керек» деп жазылган.
Ошондой эле токтомдо мамчиновниктер өлкө ичиндеги сапарда жүргөндө аларды аэропорт, темир жол вокзалдарынан тосуп алуу иш-чаралары болбошу керектиги жана аларды бир гана адам коштоп жүрүүгө болору баса көрсөтүлгөн. Мындан сырткары аларга иш сапар учурда ашыкча транспорт, жашоочу жай каралбай турганы жана иш сапардын маршрутун, күндөрүн өзгөртүүгө тыюу салынары эскертилген.
Мелис СОВЕТ уулу,
«Кыргыз Туусу»