26-майда Жогорку Кеңештин төрагасы Нурланбек Тургунбек уулу Армениянын президенти Ваагн Хачатурян менен жолугушту.
Маалыматка ылайык, жолугушууда эки өлкө ортосундагы саясий-экономикалык, маданий-гуманитардык алакалар талкууланып, кызматташтыкты өнүктүрүү боюнча сунуштар айтылды.
Төрага Нурланбек Тургунбек уулу Кыргызстан Армения менен болгон алакаларга чоң маани берерин белгилеп: “Эки мамлекет ортосунда конструктивдүү саясий диалог түзүлүп, керектүү келишимдик-укуктук база калыптанган. Биз мындан ары да жигердүү кызматташып, эл аралык уюмдар жана интеграциялык бирикмелердин алкагында да тыгыз иш алып барууга кызыкдарбыз”, – деди.
Ал эми Армениянын президенти Ваагн Хачатурян акыркы жылдары жогорку деңгээлдеги жолугушуулар байма-бай өтүп жатканын эске салып, бул расмий сапар байланыштарды бекемдөөгө кошумча түрткү берерин билдирди.
Ваагн Хачатурян парламенттик дипломатиянын ролу чоң экенин айтып: “Биз Борбор Азияны жана андагы өлкөлөрдү чыгыш менен батышты байланыштырган көпүрө сыяктуу көрөбүз. Андыктан армян тарап чөлкөмдөгү мамлекеттер, анын ичинен Кыргызстан менен өнөктөштүктү бекемдеп, бардык тармактар боюнча кызматташууга кызыкдарбыз”, – деди.
Айрыкча бизнес коомчулуктун ортосундагы диалогду кеңейтип, жогорку технологиялар жаатындагы алакаларды да арттыруу зарыл экенин эске салды.