Түп районунда мыйзамсыз балык уулагандар аныкталып, кылмыш иши козголду. Бул тууралуу Ысык-Көл ОИИБден билдиришти.
Милиция Күрмөнтү айылындагы төрт тургундун үйүндө тинтүү жүргүзүп, 80ге жакын балык уулоочу тор, 2 моторлуу кайык, мылтык, ок-дары, капкан, балык, икра, эликтин мүйүзү жана башка мыйзамсыз шаймандарды тапты. Аталган буюмдар далил катары алынган. Учурда тиешелүү экспертизалар дайындалды.
Белгилей кетсек, 2023-жылы президент Садыр Жапаров ӨКМге көлдүн түбүн тазалоону тапшырган. Ошондон бери суучулдар таштандыларды жана балык уулоо торлорун алып чыгып жатышат.
Бирок жакында президент көлдү күтүүсүз текшерип, абал жакшырбагандыгы үчүн ИИМ менен УКМК жетекчилерин сынга алганын УКМК төрагасы Камчыбек Ташиев билдирген. Анын айтымында, укук коргоо органдарынын жоопкерчилиги күчөтүлөт.