Кыргызстандык балбан Айпери Медет кызы Венгриянын Будапешт шаарында өтүп жаткан эл аралык “Polyák Imre & Varga János 2025” рейтингдик турниринде коло байге утуп алды.
Айпери 76 кг салмак категориясында күч сынашып, төмөнкү жыйынтыктарды көрсөттү: чейрек финалда АКШлык Даймонд Гилфорд менен беттешип, 4:4 эсебинде бара жатып атаандашын “туше” ыкмасы менен жеңип, жарым финалга чыкты. Жарым финалда бразилиялык Тамирес Мачадого 5:10 эсебинде утулду. Үчүнчү орун үчүн болгон таймашта Түштүк Кореянын балбаны Соен Чжонду ири айырма — 12:1 эсебинде утуп, турнирдин коло медалын камсыздады.
Бул турнир Дүйнөлүк күрөш уюму (UWW) тарабынан өткөрүлүп, дүйнөлүк рейтингде маанилүү орунду ээлейт.
Эскерте кетсек, Айпери Медет кызы — Кыргызстан аялдар күрөшүндөгү алдыңкы спортчулардын бири. Ал буга чейин да дүйнөлүк жана континенталдык мелдештерде ийгиликтерге жетишип келген.