Камчаткада төрт баллга жеткен жер титирөө уланууда, акыркы суткада 41 жер титирөө катталды. Бул тууралуу РИА Новости жазды.
«24 сааттын ичинде 41 жер титирөө болду. Анын сегизи калктуу конуштарда 2 баллдан 3 баллга чейин сезилди», — деп айтылат маалыматта.
Эске салсак, бир күн мурун жарым аралда сутка ичинде 49 жер титирөө катталган.
Ал эми 30-июлда Камчаткада 1952-жылдан бери эң катуу, күчү 8,8 баллга жеткен жер титирөө болгон. Жердин силкинүүсү Түндүк Курил аралдарында да 8 баллга чейин сезилген. Камчаткада жана Түндүк Курил районунда цунами коркунучу жарыяланып,өзгөчө кырдаал киргизилген. Цунаминин төрт толкуну порт инфраструктурасын жана башка объектилерди жарым-жартылай жабыркаткан.