Ош облусунун Алай районундагы Гүлчө айылына райондук маанидеги шаар статусун берүү боюнча мыйзам долбоору Жогорку Кеңештин кароосуна киргизилди.
Документке ылайык, айыл аймагына 12 айыл кирет, алардын ичинде райондун административдик борбору болгон Гүлчөдө 22 миңден ашуун калк жашайт. Бул жерде администрация, сот, прокуратура, УКМК, банктар, мектептер жана бала бакчалар сыяктуу негизги мекемелер жайгашкан.
Мыйзамга ылайык, калкы 10 миңден ашкан жана социалдык-өндүрүштүк инфраструктурасы өнүккөн калктуу конуш шаар статусун ала алат.
Демилге жергиликтүү бийлик менен тургундар тарабынан колдоого алынып, бардык ведомстволук текшерүүдөн өткөн. Мыйзам кабыл алынса, Гүлчө айылы расмий түрдө райондук маанидеги шаар болуп калат.