АКШ БУУнун Коопсуздук Кеңешиндеги Газа секторунда токтоосуз жана туруктуу ок атышууну токтотууга чакырган резолюцияга вето койду. Документти калган 14 мүчө өлкө колдогон.
Резолюция ошондой эле Израилди 2,1 миллион палестиндикке гуманитардык жардам жеткирүүгө коюлган чектөөлөрдү алып салууга чакырган жана абалды “катастрофалык” деп атаган.
Вашингтон вето чечимин резолюцияда ХАМАС айыпталбаганы жана Израилдин өзүн-өзү коргоо укугу белгиленбегени менен түшүндүрдү.
АКШнын саясат боюнча кеңешчиси Морган Ортагус:
«Бул документ ХАМАСты актап, Израилди айыптаган жалган нарративдерди легитимдештирет. Ошондуктан биз ага каршы чыктык», — деди.
Добуш берүү бир нече күндөн кийин өтө турган БУУнун Башкы Ассамблеясындагы жыйналыш алдында болуп өттү. Байкоочулардын айтымында, анда Газанын маселеси негизги тема болот жана АКШнын негизги союздаштары Палестинаны мамлекет катары таануу чечимин колдошу мүмкүн.