2025-жылдын 23-сентябрында Бишкек шаарында «Борбордук Азия өлкөлөрүнүн парламенттери: аймакты ар тараптуу өнүктүрүү үчүн натыйжалуу чечимдер» аттуу III Парламенттер аралык форум өтөт.
Иш-чарага Борбордук Азия мамлекеттеринин парламент төрагаларынын катышуусу күтүлүүдө. Форумдун негизги максаты — өлкөлөрдүн парламенттер аралык кызматташтыгын чыңдоо, туруктуу экономикалык өсүштү камсыздоо, миграциялык процесстерди жөнгө салуу жана санариптик чөйрөнү өнүктүрүү болуп саналат.
Форумдун алкагында «Миграция жана эмгек агымдары: жарандардын укуктарын мыйзамдык жактан камсыздоо жана экономиканын туруктуулугу», «Инвестициялык климатты жакшыртуу жана Борбордук Азия мамлекеттеринин экономикасынын ачыктыгын жогорулатуу боюнча мыйзам чыгаруу чаралары», «Парламенттер жана санариптик суверенитет: киберкоопсуздук, санариптик чөйрөнү укуктук жөнгө салуу» сыяктуу темалар талкууланат.
Эскерте кетсек, биринчи форум 2023-жылы Казакстанда, экинчиси 2024-жылы Өзбекстанда өткөн.