Либерал-демократиялык партиясы (ЛДП) Жапонияда жаңы төрагасын шайлады. Бул кызматка алгачкы ирет аял — 64 жаштагы Санаэ Такаити келди. Ал консервативдүү көз караштары менен белгилүү. Эми аны премьер-министрликке парламент бекитиши керек.
«Мен ЛДПнын тарыхына кирдим, — деди Такаити добуш берүүнүн жыйынтыгы жарыялангандан кийин партиялаштарына. — Азыр жеңишке кубануунун ордуна алдыда мени күтүп турган чоң көйгөйлөргө жана аларды сиздер менен бирге чечүүгө даярданышым керек экенин сезип жатам».
Анын айтымында, партияны «энергиялуу жана жандуу» кылып, элдин тынчсыздануусун үмүткө айландыруу максаты турат.
Жеңиш сөзүндө Такаити ошондой эле «жеке жашоо менен жумуштун ортосундагы тең салмактуулук идеясын четке какканын» белгилеп, «иштейбиз, иштейбиз жана дагы иштейбиз» деп убада берди.