Кыргыз Республикасынын Борбордук шайлоо комиссиясы (БШК) шайлоочуларга, талапкерлерге жана саясий партияларга мыйзамсыз акча чогултууга жол берилбестигин эскерткен расмий билдирүү таратты.
БШКнын маалыматына караганда, социалдык тармактарда айрым адамдар үчүнчү тараптын мобилдик тиркемелери аркылуу шайлоо өнөктүгүнө каражат чогултууну сунуштап жатышат. Комиссия мындай аракеттер шайлоо мыйзамдарына каршы келерин баса белгиледи.
Расмий түрдө шайлоо фонддоруна акча “Элдик Банк” жана “Айыл Банк” аркылуу гана, анын ичинде алардын расмий мобилдик тиркемелери аркылуу которулушу керек. Бул кызматтар аркылуу мыйзамдуу жана ыктыярдуу кайрымдуулук гана кабыл алынат.
Ар бир талапкер же партия бардык түшкөн каражаттарды атайын бирдиктүү эсепке топтоого милдеттүү. Ал каражаттар жеке жана юридикалык жактардын ыктыярдуу кайрымдуулугунан жана талапкердин жеке каражаттарынан түзүлөт.
БШК бардык катышуучуларды мыйзамсыз акча жыйноо аракеттеринен алыс болууга чакырып, мыйзам бузгандар жоопкерчиликке тартыларын эскертти.