Кыргыз Республикасынын Министрлер Кабинети транспорт каражаттарынын айдоочуларын даярдоо жана кайра даярдоо боюнча билим берүү ишин лицензиялоого убактылуу тыюу салуу (мораторий) тууралуу токтом кабыл алды. Тиешелүү чечимге Министрлер Кабинетинин төрагасы Адылбек Касымалиев кол койду.
Мораторий 2025-жылдын 20-октябрынан 2027-жылдын 31-декабрына чейин күчүндө болот. Бул чара транспорт каражаттарынын айдоочуларын даярдоонун сапатын жогорулатуу максатында кабыл алынган. Мораторий мамлекеттик билим берүү мекемелерине таандык эмес.
Токтомду аткарууну Кыргыз Республикасынын Президентинин Иш башкармасына караштуу Транспорт каражаттарын жана айдоочулук курамды каттоо боюнча мамлекеттик борбор камсыздайт. Анын аткарылышын Президенттин жана Министрлер Кабинетинин чечимдерин аткарууну контролдоо башкармалыгы көзөмөлдөйт.
Токтом расмий жарыяланган күндөн тартып күчүнө кирет.