Ош шаарына Орусия тарабынан гуманитардык жардам катары 121 тоннадан ашуун күн карама майы жеткирилди. Бул тууралуу Орусиянын Кыргызстандагы элчилиги маалымдады.
Маалыматка ылайык, жардам БУУнун Дүйнөлүк азык-түлүк программасы аркылуу муктаж болгон үй-бүлөлөргө жана аз камсыз болгон жарандарга таратылат. Таратуу иштерине жергиликтүү бийлик органдары да тартылган.
Белгилей кетсек, Россия Федерациясы Кыргызстандагы Дүйнөлүк азык-түлүк программасынын эң ири донору болуп саналат. Акыркы 15 жылда Орусия менен БУУнун өнөктөштүгү аркылуу өлкөдө бир катар социалдык жана өнүктүрүү долбоорлору ишке ашырылып келет. Алардын ичинде улуттук мектеп тамак-аш программасы, өзгөчө кырдаалдардагы жардам жана калкты калыбына келтирүү багытындагы иштер бар.