Украина президенти Владимир Зеленский бул шаршембиде Түркияга барып, Украина–Россия согушун токтотуу боюнча сүйлөшүүлөрдү кайра жандандырууга аракет кылат. Бул тууралуу ал социалдык тармактардагы билдирүүсүндө жарыялады.
Киев менен Москва 2022-жылдын жаз айларында Түркияда бир нече жолу түз сүйлөшүүлөрдү жүргүзгөн. Бирок июль айынан тарта бул процесс толугу менен токтоп калган.
Зеленский акыркы билдирүүсүндө дипломатиялык аракеттерди күчөтүүгө үмүттөнүп жатканын белгиледи: «Сүйлөшүүлөрдү активдештирүүгө даярданып жатабыз. Партнёрлорго сунуштай турган бир катар чечимдерибиз бар», — деди ал.
Украина лидери Түркия президенти Режеп Тайып Эрдоганга өзүнүн жаңыртылган тынчтык пландарын сунуштаары айтылууда. Ошондой эле АКШ президенти Дональд Трамптын атайын өкүлү Стив Уиткофф да Анкарага келери күтүлөт.
Россия тарап Түркияда өтө турган бул жолугушууга өз өкүлдөрүн жөнөтпөсүн расмий билдирди. Кремлдин пресс-секретары Дмитрий Песковдун айтымында, Владимир Путин АКШ жана Түркия менен сүйлөшүүлөрдүн жыйынтыгы боюнча пикир алышууга «ачык».
Ошол эле учурда Москва мурдагыдай эле Путин менен Зеленскийдин түз жолугушуусун мүмкүн эмес деп эсептейт. Кремль Трамптын токтошуу жана андан кийинки тынчтык сүйлөшүүлөрүн улантуу боюнча демилгесин да бир нече жолу четке каккан.
Соңку айларда украин жана батыш дипломаттары Зеленский менен Путиндин саммитин уюштурууну бир нече ирет сунушташкан. Бирок Москва мындай форматка макул болбой, түз сүйлөшүүлөрдүн азыркы шартта мүмкүн эместигин айтып келет.