Иранда нааразылык акцияларында кеминде 45 киши набыт болду — укук коргоочулар
8–9-январь, 2026-жыл
Эл аралык укук коргоо уюмдары Иранда уланып жаткан нааразылык акцияларында коопсуздук күчтөрү демонстранттарга каршы күч колдонуп, ок атып жатканын билдиришүүдө. Норвегияда жайгашкан Iran Human Rights (IHR) уюмунун маалыматына ылайык, митингдер башталгандан бери кеминде 45 адам каза болду, алардын сегизи өспүрүмдөр.
Уюмдун билдирүүсүндө 7-январь эң кандуу күн болгону, ошол күнү 13 адамдын өлүмү тастыкталганы, ошондой эле 2 миңден ашуун киши камакка алынганы айтылат.
Ал эми AFP агенттиги расмий бийлик жана мамлекеттик маалымат каражаттарына таянып, акциялар башталгандан бери кеминде 21 адамдын өлүмү катталганын, алардын арасында коопсуздук кызматкерлеринин өкүлдөрү да бар экенин кабарлады.
Интернеттин абалына мониторинг жүргүзгөн Netblocks уюму 8-январда Иранда Интернет жапырт өчүрүлгөнүн маалымдады. Уюмдун билдирүүсүндө “түз эфирдеги көрсөткүчтөр өлкө боюнча кеңири масштабдагы өчүрүүлөрдү көрсөтүп жатат” деп айтылган.
Human Rights Activists News Agency агенттигинин маалыматына караганда, нааразылык акциялары Ирандын бардык 31 провинциясында, жалпысынан 348 жерде өткөн.
8-январда Ирандын президенти Масуд Пезешкиан коопсуздук органдарын демонстрацияларды жөнгө салууда “өтө токтоолукка” чакырып, “зордук-зомбулукка же мажбурлоого жол берилбеши керектигин” билдирди.