Азербайжандын президенти Ильхам Алиев Давостогу Дүйнөлүк экономикалык форумда сүйлөп жатып, Азербайжан менен Армения согушту токтотуп, тынч коңшулаш жашоого өтүү чечимин кабыл алганын билдирди. Бул тууралуу Report агенттиги маалымдады.
Алиевдин айтымында, аскердик каршылыкты улантуу чексиз согуштарга, жаңы курмандыктарга жана азап-тозокко алып келмек.
«Биз согушту уланта берсек болмок, бирок бул эч качан бүтпөгөн жаңжалга айланмак. Кимдир бирөө аны токтотушу керек эле. Биз токтотуу чечимин кабыл алдык», — деди президент.
Анын белгилешинче, согушту токтотуу тууралуу чечим эки тараптын макулдашуусунун негизинде кабыл алынган. Ал 2025-жылдын 8-августунда Вашингтондо өткөн жолугушууда Азербайжандын президенти Ильхам Алиев, Армениянын премьер-министри Никол Пашинян жана АКШнын президенти Дональд Трамп жетишкен макулдашууларга таянат. Президенттин айтымында, бул келишимдер азыртадан эле практикалык жыйынтыктарды бере баштады.
Ильхам Алиев ошондой эле жаңжал учурунда эл аралык уюмдардын ортомчулугуна болгон үмүттөр акталбаганын белгиледи. Анын ичинде БУУнун Коопсуздук кеңешинин армян аскерлерин Тоолуу Карабахтан чыгаруу тууралуу резолюциялары иш жүзүндө аткарылган эмес.
Президент билдиргендей, учурда Азербайжан менен Армениянын мамилеси кызматташтык фазасына өтүүдө. Анын алкагында жүк ташууга коюлган тоскоолдуктарды алып салуу, ошондой эле стратегиялык мааниге ээ товарларды, анын ичинде мунай продуктуларын Арменияга жеткирүү маселелери каралууда.