Касымалиевдин айтымында, өнүктүрүү боюнча өнөктөштөрдүн, өзгөчө Азия өнүктүрүү банкынын колдоосу менен аймактык мааниге ээ ири долбоорлор ишке ашырылып, техникалык консультациялардын аркасында алардын натыйжалуулугу камсыздалууда. Ал БАЭК демилгелеринин негизинде аймактык рынокторго жана кызмат көрсөтүүлөргө жеткиликтүүлүк кеңейип, сооданын өсүшүнө шарт түзүлүп, Кыргызстан транспорттук-логистикалык хаб катары чыга баштаганын кошумчалады.
Министрлер Кабинетинин башчысы кызматташтыктын артыкчылыктуу багыттары катары региондогу соода-экономикалык байланыштарды кеңейтүү, транспорттук коридорлорду модернизациялоо жана мультимодалдык эл аралык маршруттарга интеграциялоону атады. Ошондой эле чек арадагы процесстерди тездетүү жана ачык-айкын кылуу үчүн «бирдиктүү терезе» улуттук маалыматтык системаларын толук кандуу киргизүүгө көмөктөшүү маанилүү экенин белгиледи. Анын айтымында, бул чаралар бажы процедураларын шайкеш келтирүүгө жана сооданын кыймылын олуттуу жеңилдетүүгө мүмкүндүк берет.
Ал адамдык капиталды өнүктүрүү да аймактык интеграциянын негизги бөлүгү экенин баса белгилеп, БАЭК өлкөлөрүнүн эмгек рыногу боюнча маалыматтык системаларын интеграциялоо багытындагы иштерди улантуу зарылдыгын айтты. Касымалиев Кыргызстан БАЭК алкагындагы бардык өз ара пайдалуу демилгелерди ишке ашырууга активдүү катыша берерин белгилеп, платформанын мындан аркы өнүгүшүнө даярдыгын билдирди.
Иш-чаранын жыйынтыгында катышуучу тараптар бир катар кызматташтык документтерине кол коюшту.