Буга чейин провайдерлердин өкүлдөрү демонтажга аз убакыт берилгендиктен шаардыктар интернетсиз калышы мүмкүн экенин айтып коңгуроо кагышкан.
Бишкек шаарынын мэриясы интернет-провайдерлерге зымдарды демонтаждоого 48 саат берилгени боюнча түшүндүрмө берди.
“Бишкек шаардык транспорт” муниципалдык ишканасынын жетекчиси Талантбек Капаров билдиргендей, провайдерлерге демонтаж боюнча эки жолу расмий кат жөнөтүлгөн. Аларга февралдын башында 1-мартка чейин убакыт берилип, кийин мөөнөт 31-мартка чейин узартылган.
Капаровдун айтымында, мындай иш-чара “Таза асман” долбоорунун алкагында жана Көчмөндөр оюндары менен ШКУнун саммитине даярдыкка карата жүрүүдө.
Интернет зымдары Жибек Жолу, Айтматов/Манас, Абрахманов/Байтик баатыр, Чүй проспектилеринин, Горький, Ахунбаев жана Ауэзов көчөлөрүнүн айрым бөлүктөрүндө алынууда.