Кыргызстандын хоккей боюнча улуттук курама командасы Хоккей боюнча дүйнө чемпионаты (экинчи дивизион, В тобу) мелдешинде 5-орунду ээледи.
Турнир 6–12-апрель күндөрү София шаарында өтүп, ага алты команда катышкан. Командалар бир айлампа форматында беттеш өткөрүштү.
Кыргызстан курамасы беш оюн өткөрүп, жыйынтыгында 4 упай топтоп, турнирдик таблицада 5-орунга жайгашты.
Акыркы турда Жаңы Зеландия командасына каршы оюн өзгөчө курч мүнөздө өттү. Кыргызстандык хоккейчилер биринчи периоддо 3:0 эсебинде алдыга чыгып, бирок оюнду сактап кала албай, 4:5 эсебинде жеңилип калышты.
Белгилей кетсек, бул беттешке чейин курама командада коло медаль утуп алуу мүмкүнчүлүгү да, ошондой эле акыркы 6-орунга түшүп калуу коркунучу да бар болчу.
Турнирдин жыйынтыгында чемпион наамын Израиль курамасы жеңип алса, экинчи орунду Жаңы Зеландия, үчүнчү орунду Исландия ээледи.