Кыргыз Республикасынын Президенти Садыр Жапаров 10-майдан тартып бир ай бою облус, район жана шаар жетекчилери эл менен жолугушуп, алардын көйгөйлөрүн жеринде угуу милдетин койгонун билдирди.
Мамлекет башчысы бул тууралуу 14-апрелде Ош облусунун Кара-Кулжа районунун тургундары менен болгон жолугушууда айтты.
Анын белгилешинче, акыркы күндөрү Ош облусун кыдырып жүрүп, жарандардын көпчүлүк көйгөйлөрү жергиликтүү бийлик деңгээлинде чечиле турган маселелер экенине ынанган.
Президенттин тапшырмасына ылайык, 10-майдан кийин бир ай аралыгында бардык деңгээлдеги жетекчилер айыл өкмөттөрүнө барып, эл менен түз жолугушууларды өткөрүшөт. Ар бир жолугушуу кеминде үч саатка созулуп, жарандардын арыз-муңу угулуп, тиешелүү чаралар көрүлөт.
Ошондой эле бул иш-чарага Министрлер Кабинетинин өкүлдөрү да катышары белгиленди.
Президент жергиликтүү жетекчилерди элге жакын болуп, көйгөйлөрдү жеринде чечүүгө чакырды.