Мамлекеттик катчы кыргызстандыктарды Ак калпак жана улуттук кийимдер күнү менен куттуктады.
Сүйүнбек Касмамбетов улуттук кийимдердин ар бир өңүтү терең мааниге ээ экенин айтып, ааламдашуу доорунда балдарга бабалардан калган дөөлөт-мурастарды, тилди, дилди жеткирүү башкы милдет экенин белгилеген.
«Улуттук кийимдерибиздин жасалышы, жасалгаланышы, бастырылган оймо-чиймелеринин ар бири кандайдыр бир мааниге ээ экени бүгүнкү күндө дагы дүйнө элин бир чети суктандырып, бир чети кызыктырып, кыргыз маданиятынын уникалдуулугун айгинелеп турат. Улуттун улуулугун сактап, байыркы нарк-насилибиз, көөнөргүс казынага айланган баалуулуктарыбыз катары улуттук кийимдерибизди аздек туталы, бийик кармайлы. Ак калпагыбыз ар бир кыргызстандык эр азаматтын башынан түшпөсүн», — деген ал.