Кыргызстанда ЕАЭБ талаптарына жана эл аралык стандарттарга жооп берген АИ-92 жана АИ-95 үлгүсүндөгү бензин чыгарыла баштайт.
Сапаттуу күйүүчү май учурда модернизацияланып жаткан мунайды кайра иштетүүчү “Кыргыз Петролеум Компани” заводунан чыгарылат. Бул жерде 21 миң тонна нефть продуктылары сактала турган цистерналар үчүн орундар даярдалган. Бардык иштерди 2027-жылдын аягында бүтүрүү пландалууда.
Жалал-Абаддагы нефтини кайра иштетүүчү заводду дүйнөгө белгилүү SPEC ENGINEERING INC компаниясы оңдоп жатат. Модернизациянын жалпы суммасы 410 млн долларды түзөт. Анын 200 млн доллары инвестор тарабынан, 110 млн доллары мамлекет, калган 100 млн доллары “Кыргызнефтегаз” тарабынан берилген.
Мамлекеттик мүлктү башкаруу агенттиги завод уникалдуу технология менен курулуп жатканын жана Борбор Азияда алгачкылардан болорун билдирди.