Бишкек шаарында жылытуу мезгили аяктагандан кийин ысык суунун температурасы убактылуу төмөндөшү мүмкүн.
Муниципалитеттен билдиришкендей, биринчи себеп – ысык суунун жылуулук электр борборунан (ЖЭБ) керектөөчүнүн кранына жеткенге чейинки түтүктөрдө табигый муздашы. Кышында жылытуу мезгилинде, эки түтүктүү циркуляциялык режимде, ЖЭБден керектөөчүгө чейинки суу температурасынын төмөндөшү орточо 3-5 ℃ ашпайт.
Бирок жаз жана жай мезгилинде, жылуулук түйүндөрү бир тараптуу (тупиковый) схема менен иштегенде жана суу агымы 3-4 эсеге азайганда, кыйла муздай баштайт. Түн ичинде, ысык суу дээрлик колдонулбаган учурда, анын температурасы дагы да төмөндөйт.
Экинчи себеп – турак жайларда электр суу ысыткычтарынын, душтардын массалык түрдө орнотулушу жана ошондой эле же иштебей калган аралаштыргычтар да себеп болот.