2025-жылдын 16–17-октябрында Майлуу-Суу шаарында “Туруктуу туризм аркылуу Майлуу-Суу шаарынын өнүгүүсү – Унутулган шаарларды жандандыруу” аттуу форум болуп өттү. Иш-чараны Майлуу-Суу шаардык мэриясы жана ЕККУнун Бишкектеги Программалык кеңсеси БУУӨП жана Европа Биримдигинин колдоосу менен уюштурду.
Форумдун негизги максаты — мурда уран өндүрүшү менен белгилүү болгон Майлуу-Сууну экологиялык жана экономикалык жактан кайра жандандыруу, туруктуу туризмди өнүктүрүү аркылуу шаардын аброюн жогорулатуу болду.
Президенттин тоолуу аймактарды өнүктүрүү боюнча атайын өкүлү Динара Кемелова Майлуу-Сууну оор экологиялык мурасты жеңип, туруктуу өнүгүүнүн үлгүсүн көрсөтүп жаткан шаар катары белгиледи.
Иш-чарада туризмди, экологияны, органикалык өндүрүштү жана ишкердикти өнүктүрүү багыттарындагы демилгелер талкууланды. Катышуучулар “Сити-тур — ‘Өтө жашыруун’ грифи бар шаар” экскурсиясына катышып, жергиликтүү өндүрүшчүлөрдүн жана кол өнөрчүлөрдүн көргөзмөсүн көрүштү.
Форумдун жыйынтыгында Майлуу-Суунун туристтик потенциалын 2030-жылга чейин өнүктүрүүгө багытталган резолюция кабыл алынды.