Салык кызматынын төрагасы Алмамбет Шыкмаматов өкмөт башчы Адылбек Касымалиев жарыялаган патент системасына кайтуу боюнча Кактус медиага маалымат берди.
Айтымында, бул президенттин тапшырмасы менен жасалган. Учурда чакан жана орто бизнестин патенттери кайтарылып бериле турган токтомдун долбоору даярдалууда.
«Патенттин тарифтери мурдагыдай болбойт. Алар ишкерлердин кирешесин жана аймактардын өзгөчөлүктөрүн эске алуу менен белгиленет. Бул соода, кичи жана орто бизнеске тиешелүү», — деди Шыкмаматов.
Ал базарлар үчүн өзгөчө режим Кара-Суу базарында гана сакталып, Дордойдо жокко чыгарылганын белгиледи. Ал эми Кара-Суу базарында бирдей тариф патентке алмаштырылат.
«Салык салуунун патенттик формасына кайтып келгендер ККМ жана ЭСФ колдонуудан бошотулат»,- дейт Алмамбет Шыкмаматов.
Ал эми патенттердин так тизмеси кийинчерээк берилет деп убада кылды.