Президенттин Иш башкармалыгынын башчысы Каныбек Туманбаев өлкөнүн түштүгүндө паспорт даярдоонун зарылчылыгы жок деп эсептейт. Бул тууралуу ал бүгүн, 31-мартта журналисттерге билдирди.
Буга чейин Жогорку Кеңештин жыйынында депутат Бекмурза Эргешов жарандык паспортторду өлкөнүн түштүгүндө да берүүнү суранган, анткени Бишкекте шашылыш паспортту үч саатта алууга мүмкүн болсо, Баткен, Жалал-Абад жана Ош облустарында эң аз дегенде эки күн, алыскы райондордо жок дегенде эки күн талап кылынгандыгын белгилеген.
Анын айтымында, 2024-жылы паспорт алуу үчүн бул үч аймакта 240 миңден ашык арыз түшкөн, бул өлкө боюнча жалпы кайрылуулардын 40 пайыздан ашыгын түзөт.
Каныбек Туманбаев өлкөнүн түштүгүндө ар бир жаран үч күндүн ичинде шашылыш паспорт алуу мүмкүнчүлүгү бар экенин, ошондуктан басмакана ачуу үчүн бюджеттик акчаны коротуунун кереги жок экенин айтты.