Япон инженерлери адамды 15 мүнөттө жуунтуп, сергитип коё турган “адам жуугуч” Mirai Ningen Sentakuki машинасын жасап чыгышыптыр.
Бул техниканын бир чоң адам бата турган капсуласы жылчыксыз жабылып, жасалма интеллект менен жабдылган. Капсуладагы жогорку ылдамдыктагы, 3 микрометр диаметрдеги суу чачыратмалары адам денесин кылдаттык менен тазалап чыгат. Ошондой эле капсула ичиндеги датчиктер дененин температурасын, пульсун көзөмөлдөп, жуунтуу адамга жагымдуу болушун шарттайт. А жасалма интеллект болсо адамдын эмоционалдык акыбалын анализдеп, ошого жараша капсуланын ички бетине аны тынчтандыра турган видеолорду чыгарып берет. Аталган техника быйыл Осакодогу Expo 2025 көргөзмөсүнө коюлуп, 1000 адамга түшүүгө мүмкүнчүлүк түзүлөт. Sanyo Electric компаниясы келечекте бул жабдыкты ар бир адамга жеткиликтүү кылууну пландаштырып жатыптыр.