Министрлер кабинетинин төрагасы Адылбек Касымалиев Ысык-Көл облусуна болгон жумуш сапарынын алкагында Каракол жана Чолпон-Ата шаарларында курулуп жаткан ипотекалык үйлөрдүн курулуш иштеринен кабар алды.
Өкмөт башчы Адылбек Касымалиев мындай долбоор Кыргызстандын жарандарына жеткиликтүү, сапаттуу жана коопсуз турак жай менен камсыздоо максатында ишке ашырылып жатканын белгиледи.
Курулуш, архитектура жана турак жай-коммуналдык чарба министрлигинин, Мамлекеттик ипотекалык компаниясынын маалыматтарына ылайык, жалпы курула турган батирлердин саны 5 112. Бүткөрүү мөөнөтү үч этаптан туруп, ал 2028-жылдын аягына чейин созулат. Ал эми, каржылоо өз нугунда жүрүүдө. Үйлөрдү курууда жогорку сапаттагы материалдар колдонулуп, бардык сейсмикалык коопсуздук талаптары сакталганы айтылат.
Белгилей кетсек, батирлер Мамлекеттик программанын алкагында социалдык, жеңилдетилген жана жеткиликтүү ипотека багыттары боюнча кезекте турган жарандарга берилет. Ошондой эле биргелешкен курулуш механизми менен кезексиз берүү жагы каралганы маалымдалды.