Минск шаарында Улуу Ата Мекендик согуш жылдарында Беларусту бошотууда өзгөчө эрдиги менен айырмаланган кыргызстандык жоокерлерге арналган салтанаттуу кече болду.
Тышкы иштер министрлигинен билдиришкендей, иш-чарага коомдук, маданият жана илимий ишмерлер, “Достук үйүнүн”, “Кыргызстан-Беларусь” достук коомунун өкүлдөрү, Минск шаарындагы ЖОЖдордун жана колледждердин студенттери катышты.
Кыргызстандын Беларустагы элчиси Эрбол Султанбаев кыргызстандык жоокерлер боордош элдер менен катар жалпы жеңишке жетишкенин, бардык ири салгылашууларга, анын ичинде Беларусиянын аймагы толугу менен бошотулган “Багратион” чабуул операциясына катышканын белгиледи.
Иш-чаранын жүрүшүндө катышуучулар кыргыз акындарынын чыгармаларын беларус тилиндеги котормолорун окуп, музыкалык чыгармалар тартууланып, даректүү тасмалар көрсөтүлдү.